GIKONDENAR sa Akbayan Youth CDO ang padayong pagdominar sa gobyerno sa Pilipinas sa mga politiko nga sakop sa political dynasty, sa nasyonal ug lokal nga lebel.
Sumala ni Kyle Chester Cotacte, nagatoo ang grupo nga dili lamang ang mga anaa sa dinastiya ang adunay kapasidad sa pagdumala ug mahimong maayong lider sa nasud.
Matod pa niya, daghang civil society leaders, academically inclined nga mga indibidwal, ug grassroots leaders sa barangay ang aduna usab kakayahan sa pagdala sa bug-at nga responsibilidad sa gobyerno.
Gipunting sa grupo nga ang tumong mao ang pag-regulate sa gahum sa nagkalain-laing political families aron mahatagan og mas lapad nga kahigayonan ang ubang sektor nga makapartisipar sa pagdumala sa nasud.
Dugang pa ni Cotacte, kini lamang mahimo kon mapasar ang Anti-Political Dynasty Bill, nga maghatag og klarong giya batok sa konsentrasyon sa gahum sa pipila ka pamilya sa politika. (James Oliver)
