Gibutyag ni Liceo de Cagayan University College of Law Atty. Samson So Tan nga dako nga timailhan nga walay kasiguruhan ang majority bloc nga makakuha og napulo’g unom ka boto batok kay Bise Presidente Sara Duterte.
Kini human giduha-duhaan ni Senator Erwin Tulfo ang kinahanglang voting threshold sa padayong impeachment proceedings sa Senado.
Gipasidaan sa maong legal nga eksperto nga ang bisan unsang pagpaminus sa gikinahanglang boto pinaagi sa pag-disqualify sa mga absent nga senador magdala ra og bag-ong kontrobersiya ug petisyon gikan sa mga tigpaluyo sa Bise Presidente.
Dungan niini, gipahinumdoman ni Tan nga ang opisyal nga pag-ihap sa boto kinahanglang buhaton sa adlaw mismo sa botasyon ug dili samtang nagpadayon pa ang mga pagdungog.
