CAGAYAN DE ORO CITY-Gikasubo ni Cagayan de Oro City Election Officer Atty Ramil Acol ang ubos nga ihap sa nagduso’g sertipiko de kandidatura alang sa umaabot Brgy ug SK elections sa Mayo 14 ning tuiga.
Si Acol miingon nga anaa lamang sa 2,571 ang nakaduso sa ilang certificate of candidacy kon CoC’s.
Apan bisan niini, naglaum si Acol nga mosaka pa ang maong ihap sa moduso sa ilang kandidatura taliwala nga ning adlawa ang deadline sa pagduso’g CoC’s.
Gitin-aw ni Acol nga hangtud alas-5:00 sa hapon lamang ning adlawa ang ilang pagdawat sa sertipiko de kandidatura.
Sumala ni Acol nga sugod alas 4:45 sa hapon ila nang ipang-lista ang mga moduso sa ilang kandidatura nga anaa sa ilang buhatan.
Ang mga pangalan nga anaa sa ilang listahan maoy ilang e-entertain hangtud mahurot ug dili na sila mohatag pa’g dugang lugway.
Samtang naglaum usab si Comelec Regional Director Atty Renato Magbutay nga makuha sa ilang ahensiya ang 70,000 nga expectations sa moduso sa ilang sertipiko de kandidatura karong adlawa.
Si Magbutay miingon nga base sa ilang talaan, anaa lamang sa 38,000 ka mo-kandidado ang naka-file sa ilang certificate of candidacy gikan sa 2,022 ka brgy sa tibook rehiyon-10.
