Wala girekomenda sa DepEd Cagayan de Oro ang pagpatuman sa sugyot nga paggamit og transparent bag alang sa seguridad sa mga tunghaan tungod kay makadugang lamang kini og kabug-at sa gasto sa mga ginikanan ug estudyante.
Gitin-aw ni Ryan Blanco Disaster Risk Reduction and Management o DRRM Officer sa DepEd CDO nga bisan pa man makatabang kini sa pagsiguro sa kaluwasan sa tanan dili gihapon kini pwedeng imando dayun sa mga eskwelahan tungod sa pinansyal nga bahin sa matag pamilya.
Gipahinumdoman usab sa opisyal nga kadaghanan sa mga ginikanan nagpaeskwela sa pampublikong tunghaan aron makasave sa gasto ug makakita og paagi nga makatungha gihapon ang ilang mga anak.
Tungod niini gipasalig sa maong tinugyanan nga may transparent bag man o wala padayon gihapon ang ilang higpit nga pagbantay sa seguridad sa mga bata sa tibuok sakop sa dakbayan.
