CAGAYAN DE ORO CITY – Tahas sa Local Water Utilities Administration o LWUA nga makuha sa grupo ni interim General Manager Fermin Jarales ang pipila mga importateng dokumento sulod sa iyang buhatan sa Cagayan de Oro Water District o COWD ning syudad.
Kini ang kabahin sa katin-awan ni Jarales nunot sa gipalugwa nga walo ka segundos nga video clip diin siya nakita kuyog ang pipila ka mga lalaki nga natahasan sa paghaw-as sa maong mga dokumento.
Sa sulat-pahayag ni Jarales, gipasabot niini nga napugos sila pagsulod sa COWD premises kay gidid-an pasudlon nga mahataga’g proteksyon ang mga dokumento nga nag-sentro sa ilang mga transaksyon sa mga bangko.
Kini aron magamit pangbayad sa ilang suppliers ingon man mga suhulan sa mga empleyado ug mga papeles kabahin sa kasong kriminal-administratibo sa grupo ni acting regular management General Manager Edna Najeal.
Midugang si Jarales nga obligasyon ug responsibilidad sa interim officials nga mahatagan sa proteksyon ang mga dokumento rason nga namugos sila makasulod sa COWD niadtong tungura.
Miklaro usab kini nga kung napugos sila pagsulod sa COWD premises,gumikan ra gihapon sa pagpugong-pugong ni Najeal nga suportado sa set aside nga board of directors gamit ang reperensiya nga hukom sa korte nga klaro nga dili pa pinal ug hilaw pa aron ipatuman.
Mohatag usab kini sa dugang pagpasabot sa katawhan sa higayon nga masubay na ang pagka-lehitimo sa nagkaylap nga video clip.
Mitapos kini sa pag-ingon nga bisan sa kahimtang sa COWD, apan pabiling prioridad nila ang paghatag sa bastante nga suplay sa panubig nga nag-unang panginahanglan sa katawhan sa dakbayan.
Hisayrang sukad sa maong hitabo,wala una nagpakita’g balik si Jarales sa COWD aron dili masubli ang komosyon samtang gihan-ay ang pagduso sa motion for reconsideration sa korte nga nagmando sa LWUA nga sila ipahunong sa interbensyon sa suliran sa panubig sa dakbayan.
