Mitug-an si City Council Minority Leader Imee Moreno nga nakurat sila sa kalit nga pagsingit sa P8.5 bilyon nga supplemental budget nga nakabutang “for approval” sa ilang agenda sa sesyon niadtong Lunes.
Gitin-aw ni Moreno nga kini nga budget mahitungod sa plano nga pagtukod sa City Hall Complex sa Barangay Carmen, ning syudad. Hinoon, sa dihang nagpadayon ang sesyon, gitangtang ra ang gisingit nga agendum ug nagpabilin nga P300 milyon ang supplemental budget nga gidebatihan para sa sunod tuig.
Nahuman ang sesyon nga wala na hisguti ang “inserted budget.”Apan pagkagabii sa Martes, nakadawat si Moreno sa abiso nga hisgutan sa committee hearing sa Law and Rules, sa Miyerkules sa buntag ang gi-apelar nga city ordinance loan ni Mayor Klarex Uy nga mubalor sa nahisgutang kantidad aron masugdan na ang pagtukod sa city hall complex.
Alang kang Kagawad Moreno, dili angay nga hisgutan ang binilyong salapi alang sa usa ka pasilidad samtang ang nasud ug ang syudad nagsagubang sa krisis sa lana ug sa domino nga epekto niini sa panginahanglan sa katawhan.
Gitin-aw usab ni Moreno nga dili siya supak sa pagtukod sa city hall, apan para kaniya, sayop ang timing sa paghisgot sa gi-apelar nga loan ordinance.
