Nagsugod na sa pag-abli ang mga bag-ong negosyo ug paglambo sa ekonomiya sa Northern Mindanao ug Caraga human natala nga 10 na lamang ka nahabilin nga sakop sa New People’s Army o NPA ang ginagukod karon sa 4th Infantry Division.
Nakatutok ang operasyon sa hukbo sa 8 ka nahabilin nga rebelde sa Gingoog ug Claveria sa Misamis Oriental, samtang ordinaryong tulisan na lang nga nagpakalat-kalat sa Agusan del Sur ang 2 ka nakaikyas.
Gipadayag ni Lt. Col. Joe Patrick Martinez, tigpamaba sa 4ID, nga dako og epekto sa moral sa tibuok grupo sa nasod ang pagkamatay sa ilang lider nga si Julia Cagadas alyas “Ka Reda.”
Tungod sa pagkahugno sa liderato sa mga rebelde ug pagkawala sa hulga sa seguridad, mas madali na karon ang pagsulod sa mga negosyo ug pamuhunan nga nakatabang sa pagtubag sa kalisod sa mga lungsuranon.
