CAGAYAN DE ORO CITY – Gikabalaka pag-ayo ni City Mayor Oscar Moreno ang pag-eskapo sa bana sa usa ka ginang nga positibo sa coronavirus disease nga nagpuyo diha sa Brgy 35 ning syudad.
Kini human unang gikuyugan sa bana ang iyang kapikas sa pagdalikyat sa Northern Mindanao Medical Center aron mopaubos sa swab test.
Miingon si Moreno nga unta itugyan sa maong lalaki ang iyang kaugalingon aron dili mapun-an ang ihap sa mga tawo nga matakdan sa sa bayrus.
Una nang gitoohan nga positibo sa bayrus ang igsoong babaye sa maong lalaki hinungdang nabalaka ang syudad nga naghambin usab kini sa balatian.
Dugtong niini,gipaubos na sa focused containment ang partikular nga lugar diin nanimuyo ang 30 anyos nga babaye nga gidudahang namatay tungod sa paghambin sa coronavirus disease sa Brgy 35 ning syudad.
Kini human gimando ni Moreno ang lapad nga contact tracing sa maong pamilya aron dili mosaka ang mga tawo nga matakdan sa bayrus.
Nasayran nga ang namatay nga babaye ang usa ka vendor diha sa merkado Cogon sa syudad.
Una nang nakasinati sa pagsuka-suka ug loose bowel movement ang biktima ayha kini namatay niadtong adlaw’ng Domingo.
