CAGAYAN DE ORO CITY, Philippines – Kompirmadong patay ang usa ka 73 anyos nga pinay human mahulugan sa nabali nga punuan sa kahoy, didto sa Tampa Florida, usa ka adlaw human gilampurnas sa Hurricane Milton ang estado.
Giila ni Philippine Embassy in Washington, DC Consul Jahzeel Cruz ang biktima nga si Luisa Santos, operator sa Oakland Manor Assisted Living facility alang sa mga Senior Citizens sa maong syudad.
Segun sa iyang anak nga si Wendy Tantozo nga halos wala natulog ang iyang inahan tibook gabie, dihang kamulong gikuso-kuso sa kusog nga ulan ang bay area, ug giprayoridad ang pagbantay sa mga katigulangan aron ipapaniguro nga sila luwas sulod sa pasilidad.
Sa pagkabuntag, usa si Santos sa mga nangunay sa paglimpyo sa gawas nga bahin sa ilang pasilidad, apan disgrasya natagakan ang iyang lawas sa dakung putol sa punuan sa kahoy.
Namatay sulod sa hospital ang nasampit nga ginang.
Iselebrar unta sa biktima ang iyang ika 73 nga adlaw’ng natawhan niadtong adlawa.
Walay nadawat nga report ang Department of Foreign Affairs nga dunay angol o namatay sa kapin 178,000 ka mga Overseas Filipino Workers nga nanarbaho sa apektadong estado.
Sa pagkutlo ning balita pabiling 17 ang ihap sa mga namatay human sa delubyo.
