Naminusan ug natuldokan na ang hulga sa seguridad, pang-gipit, ug extortion sa komunidad human nahugno ang liderato sa New People’s Army gikan sa Rehiyon Dyes.
Gipahayag ni Lt. Col. Joe Patrick Martinez, tigpamaba sa 4th Infantry Division sa Philippine Army, nga usa ka dakong kalampusan ang pagkawala sa impluwensya sa maong grupo nga dugay nang naghatag og kabalaka sa Northern Mindanao ug sa lungsod sa Esperanza.
Sumala sa militar, ang pagkapukan sa Regional Secretary sa NCMRC nga si Julia Cagadas alyas “Ka Reda” ug 3 ka sakop niini ang magsilbing katapusan sa ilang kapabilidad sa paghimo og kagubot.
Giila ang 3 pa ka nakalas nga sila si Junie Mansiguiao alyas “Kikoy,” Gerald Basason alyas “Doydoy,” ug Rocha Mae Mirafuentes Bihag alyas “Maki.”
Samtang padayon ang clearing operations, gipahiluna na sa mga awtoridad ang mga patayng lawas aron ihatag sa ilang pamilya.
