Nagbangutan ang Philippine Air Force o PAF sa kamatayon nila Major Jude Salang-oy ug 1Lt April John Dadulla.
Kini human hingpit nang gikompirmar sa PAF nga lawas ni Salang-oy ug Dadulla ang narekober sa mga sundalo nga nangita kanila dihang nawala ang gisakyan nila nga FA-50 fighter jet sa bukid sa Kalatungan,Brgy Mirayon,Talakag,Bukidnon.
Gibutyag ni PAF spokesperson Col. Maria Consuelo Castillo nga namatay ang ilang mga piloto nga dala ang kaisog dihang nahagsa ang gimaneho nila nga eroplano sa maong bukid.
Gisaysay ni Castillo nga si Salang-oy ang aktibong miembro sa Philippine Military Academy ‘Siklab Diwa’ Class of 2014 nga nagsilbi sa Philippine Air Force nga adunay nahuptang kadungganan tungod sa daghang higayon nga critical missions nga iyang nahimo sa serbisyo.
Samtang si Dadulla,miembro usab sa PAF Officer Candidate Course ‘Sinaglawin’ Class of 2020 diin siya nagbaton usab sa talagsaong abilidad ug kahanas rason nahatagan kini sa higayon makapalupad sa pinaka-modernong eroplanong iggugubat sa nasud.
Dugang sa PAF nga bisan sa katapusang higayon sa ilang kinabuhi, managsama nila gipakita ang ilang dedikasyon ug kaakuhan sa pagsilbi sa katawhang-Pilipinhon.
Gipaabot sa PAF ang kinasingkasing na pagsimpatiya ngadto sa mga pamilya,kahigalaan ug mga minahal sa kinabuhi nila ni Salang-oy ug Dadulla.
Dili usab malimtan sa katawhan ang gipakitang pagkabayani,pagbati ngadto sa kadaghanan ug kaisog nga gipakita sa duruha.
