CAGAYAN DE ORO CITY – Giila nila ni City Mayor Rolando ‘Klarex’ Uy;Cong Rufus Rodriguez sa segundo distrito ug kanhi City Mayor Oscar Moreno nga dakong kawad-on ug kahinugon ang pagbiya na ni former Misamis Oriental assemblyman ug 5th City Mayor Reuben Canoy ning syudad.
Kini ang kabahin sa mensahe nga gilugwa sa maong mga opisyal isip reaksyon sa pagtaliwan na ni Canoy tungod sa cardiac arrest sa miaging gabii.
Gibutyag sa maong mga opisyal nga kawad-on sa himsog nga demokrasya ang pagbiya sa kanhi city mayor apan segurado usab nga dili malimtan sa katawhan sa syudad ug lalawigan ang nahimo niini sa iyang administrasyon kaniadto.
Kabahin si Canoy kuyog sila former Misamis Oriental assemblyman Homobono Adaza,late Sen. Nene Pimentel Jr,kanhi City Mayor Vicente ‘Dongkoy’ Emano ug uban pa nga Mindanao leaders ang mihingusog sa gobiernong pederalismo sukad pa sa panahon ni kanhi Pres Ferdinand Marcos Sr hangtod sa termino ni former Pres Rodrigo Duterte.
Una nang gibutyag nga wala na gikakurat sa pamilya apan nagpasalamat na lamang sila nga wala na paantusa pa ang pagpanaw ni Canoy ning syudad.
Kini ang pagyagyag sa anak-kamagwangan sa kanhi mayor nga si Rhona Canoy sa interbyu sa Bombo Radyo.
Gibutyag ni Canoy nga bisan sa edad 93 sa ilang amahan apan wala gihapon mawala sa huna-huna niini nga unta mapabuos sa pederalismo ang sistema sa pang-gobyerno sa nasud aron dili na mabintahaan ang katawhan sa Mindanao.
Gibutyag usab niini nga buksan nila sa publiko ang haya ni Canoy sugod Hulyo 12 hangtod 14 alang sa katapusang paghatag respeto.
May himoon usab nga necrological service sa city hall sa Hulyo 11 ug sa pagka-petsa 15 himoon ang pribado lamang nga paglubong sa patay’ng lawas sa kanhi mayor.
