CAGAYAN DE ORO CITY – Dakong kawad-on sa kalihukan sa rebeldeng New People’s Army o NPA ang kamatayon sa ilang squad leader sa Cabanglasan, Bukidnon.
Gibutyag ni 88th Infantry Battalion commanding officer Lt. Col Franklin Fabic nga giila ang namatay nga si alias “Daligas”, miembro sa Guerilla Front Malayag kinsa responsable sa pagsunog sa dump truck ug pay loader sa usa ka quarry site sa Brgy Sinabuagan, Valencia City sa miaging bulan.
Nahitabo ang engkwentro sa security patrol ang militar sa Brgy Mandahikan ug ilang natagbo ang 15 ka rebelde.
Milungtad sa 10 ka minutos ang panagsinukliay sa mga bala nga gikamatay ni Daligas diin ilang narekober sa posisyon niini ang usa ka M16 rifle.
Nailog usab nila ang hideout sa mga walhong grupo diin ilang nabawi ang walo ka cellular phones, medical supplies ug personal belongings.
