CAGAYAN DE ORO CITY – Giila na ni 4th ID commanding officer Maj Gen Andres Centino nga kadaugan alang sa katawhan ang sunod-sunod nga pagka-neutralize sa mga sakop sa CPP-NPA nga naglihok sa rehiyon.
Kini human napatay sa 1st Special Forces Batallion ang duha ka NPA members sa natigayong upat ka oras nga engkuwentro sa Brgy San Rafael,Talakag,Bukidnon sa miaging adlaw’ng Sabado.
Miingon si Centino nga naghatag sa dakong kahuyang sa moral sa mga rebelde nga padayong gigukod sa ilang puwersa sa kabukiran.
Napatay usab ang usa ka sundalo samtang laing usa ng samaron ug Cafgu member nga anaa gitambalan sa Camp Evangelista Station Hospital.
Sulod lamang ning semanaha,tulo ka NPA rebels ang napatay nga gilangkipan sa taas nga opisyal niini diha sa Gingoog City,Misamis Oriental ug sa Talakag,Bukidnon.
Samtang gihupay sa 4th ID ang kabalaka sa publiko sa sunud-sunod nga military strike sa kabukiran batok sa rebeldeng New Peoples Army dinhi sa rehiyon.
Namahayag si 4th ID spokesperson Major Jhun Cordero nga kontrolado nila ang ilang operasyon batok sa nagkagamay na lang nga mga kaaway nga kontra sa estado.
Gibutyag ni Cordero nga napasayon ang pagtumok sa mga rebelde tungod sa aktibo ang pag-abag sa mga residente sa hinterland barangays sa rehiyon.
Dugtong niiini,nagtaas alerto gihapon ang militar nunot sa taliabot nga anibersaryo sa NPA nga armadong puwersa sa Communisty Party of the Philippines o CPP sa Marso 26 ning tuiga.
