Gi-depensahan sa City Disaster Risk Reduction and Management Department ang nikatap nga batikos sa social media batok sa giingong hinay nga pag-responde sa mga barangay responders sa nahitabong pagkalumos sa duha ka dalagita sa Iponan River.
Gipahayag ni CDRRMD Head Nick Jabagat nga gilayon nga gi-aplayan og river reading ug proper protocol sa pag-rescue ang dapit aron maseguro usab ang kaluwasan sa mga rescuer subay sa kapaspas sa sulog sa suba.
Gipasabot sa opisyal nga adunay mga technicalities ug search parameters nga kinahanglang sundon ilabi na sa mga suba nga dali ra nga magbag-o ang kalalom ug kakusog sa tubig.
Duyog niini, gipahinumdoman ni Jabagat ang publiko ilabi na ang mga non-swimmer nga likayan ang paglangoy sa mga delikado ug kusog nga sulog sa suba.-
