Pormal nga nasulbad ang isyu sa liderato sa Senado human gitawag sa Presidente ang usa ka special session sa panahon sa recess sa Kongreso.
Matod pa ni kanhi Cagayan de Oro Mayor ug Xavier University Law Professor Atty. Oscar Moreno, dako kining kahupayan aron matapos ang kalibog kon kinsa gyud ang angayan nga mopungko isip lider sa maong hawanan.
Gipasabot ni Atty. Moreno nga ang maong lakang naghatag og katin-awan sa mga legal nga pangutana mahitungod sa pagpuli sa posisyon sa Senado human gideklarar nga bakante ang tanang mga katungdanan niadtong Hunyo 3.
Giisip usab sa abogado nga usa kini ka positibong kalamboan nga nagwagtang sa dakong kabalaka nga naglambigit sa dagan sa atong kagamhanan.
