(Update) CAGAYAN DE ORO CITY – Dili ang depektoso nga linya sa koryente o giingong pagluto apan ang nilabay nga mga upos sa sigarilyo ang rason sa pagkasunog sa provincial health office ug buhatan sa Misamis Oriental Care System office sa kapitolyo probinsyal sa Brgy 27,Cagayan de Oro City.
Kini ang pinal nga findings sa mga imbestigador gikan sa Bureau of Fire Protection 10 nga mihimo sa imbestigasyon sulod sa usa ka bulan kabahin sa hitabo.
Gibutyag ni Senior Fire Officer 4 Sam Velarde sa BFP-10 nga wala nila na-establisar ang teorya sa deperensyado nga linya sa koryente apan ang mga ‘upos’ sa sigarilyo nga nalabay sa basurahan tupad sa storage facility sa mga bakuna ang pinaka-tinubdan sa pag-ulbo sa kalayo.
Miingon si Velarde nga misaka na usab sa balor P10 milyon ang damyos nga gilangkuban sa valuables nga iya sa provincial government ug istraktura sa gambalay.
Hinoon,walay kinabuhi nga nakalas sa maong sunog gawas lamang sa mga bakuna sa Sinovac ug ubang mga tambal ang nadamyos tungod sa maong sunog.
Sirado na ang PHO-MisOr sa dihang kalit miulbo ang dakong sunod sa miaging Abril 2021.
Una na usab gibutyag ni Provincial Governor Bambi Emano nga gitahas niya nga imbestigaran ang hitabo aron gamiton sa ilang itaho sa Dept of Health kabahin sa hitabo.
Hisayrang anaa sa dili mominus sa 50 milyon ka pesos ang pondo nga gamiton sa kapitolyo nga gikan sa buhatan ni Emano ug ‘kurambos’ nga salapi gikan sa nagkadaiyang department offices nga wala o dili magamit sama sa seminars ug educational tour epekto sa pandemya sa COVID-19.
