CAGAYAN DE ORO CITY – Gikuwestiyon sa pipila ka sakop sa konseho ang mga kakulangon ug daw hinay nga pagtubag sa medical frontliners ngadto sa mga pasyente sulod sa J.R Borja City Memorial Hospital ning syudad.
Kini human mihimo’g special report si Konsehal James Judith kabahin sa sunod-sunod pagkamatay sa mga pasyente sa gumikan sa pasangil nga langan maatiman sa mga doktor.
Gibutyag ni Judith nga migasto’g dako ang city govt sa pagtukod sa ubang mga gambalay sa syudad apan bisan pagbaton sa kaugalingong intensive care unit sa city hospital,wala kini mahupti sa dugay nang panahon.
Kini ang rason nga nangugat ang konsehal sa ilang regular session nga mapangatia’g sulbad ang mga kakulangon sa ospital.
Samtang gi-depensa ni health commitee chairman Kag Malou Gaane ang kapasidad nga makita sa city hospital ning syudad.
Miingon si Gaane nga kamulo na ang maong ospital sa paghikay sa mga dokumento aron mahimong level 2 ang kapas ug paspas na maka-akomodar sa mga pasyente.
Siya miingon nga dili usab makiangayon nga basulon ang mga doktor ug nurses kon nganong dunay pagkalangan ang pag-atiman kay daghan ang mga pasyente nga kadalikyat sa maong ospital.
Dugang ni Gaane nga bisan ang ubang mga pasyente ang duna usa’y kakulangon kon nganong dili sila madali pag-atiman sa ilang mga balatian.
Dugtong usab niini,gihagit ni City Vice Mayor Jocelyn ‘Bebot’ Rodriguez ang hingtungdang mga ahensiya nga paspasan na ang pagpalambo sa maong ospital.
Siya miingon nga dugay na unta nga panahon nga na-level 2 ang ospital kon kini gihatagan pa sa prioridad
.Siya miingon nga angayang huptan kini nga kapas kay nahimutang kini sa usa ka dakong dakbayan dinhi sa Mindanao.
Apan alang usab kang Kag Roger Abaday kinsa chairman sa komitiba sa kinaiyahan sa konseho nga angayang tutukan ang suhulan sa mga doktor ug ubang espesyalesta sa maong ospital.
Kini tungod kay maglisod pagsukol ang mga doktor sa kaubos kaayo sa presyo sa ilang suweldo.
Siya miingon nga bugtong dili mapalit sa bisan kinsa ang compensation rate sa mga doktor nga gusto ipa-trabaho sa maong ospital sa dakbayan.
