Aron supakon ang kontrobersyal nga pag-usab sa 2/3 voting threshold sa Impeachment Court, nakadesisyon ang Inday Sara Na Movement Philippines nga makig-alyansa sa legal team ni Bise Presidente Sara Duterte sa ipasaka nga petisyon sa Korte Suprema.
Sumala ni Movement Founder Daniel Nobleza, kinahanglang pangitaan ug daling aksyon sa Korte Suprema ang maong usab nga patakaran aron mapanalipdan ang integridad sa Konstitusyon ug mahatagan og katapusan ang maong samok.
Dugang pa ni Nobleza, nanawagan usab ang ilang grupo nga ipatuman na sa Lunes ang pinal nga pagboto sa trial aron dili na dugang mausik ang pondo sa katawhan taliwala sa krisis sa ekonomiya ug pagtaas sa petrolyo.
Labaw sa tanan, gipahayag sa maong opisyal nga angay nang matapos ang maong proseso aron pinal nga makita sa tanan kon kinsa ang tinuod nga nanalipod sa hustisya sa nasod.
