MAS GIPAHUGTAN sa Provincial Peace and Order Council ug Provincial Anti-Drug Abuse Council ang kampanya batok sa ilegal nga droga sa lalawigan sa Misamis Oriental.
Sumala ni PNP Misamis Oriental Provincial Police Director PCOL Al M. Abanales, mas gipakusgan sa kapulisan ang implementasyon sa mga operasyon ug kampanya kontra droga pinaagi sa hugot nga pakig-koordinar sa ubang miyembro sa PADAC.
Gipunting ni Abanales nga nagkinahanglan og mas lig-on nga koordinasyon tungod sa nagpadayon nga pagsaka sa ihap sa mga nadakpan nga indibidwal nga nalambigit sa ilegal nga droga.
Usa sa mga lakang ni Juliette Uy mao ang pag-gahin og pondo alang sa duha ka floating assets nga ihatag sa Philippine Coast Guard Misamis Oriental aron mas mapalig-on ang seguridad sa kadagatan ug mapugngan ang pagpanglusot sa mga kontrabando.
Nanawagan si Abanales sa publiko nga magtinabangay ug makig-koordinar sa mga otoridad ug ubang ahensya sa gobyerno aron mapakunhod ang problema sa droga sa lalawigan.
Ang mga miyembro sa PPOC ug PADAC nagkatigom sa lungsod sa Villanueva niadtong Pebrero 19, 2026 alang sa ilang unang kwarter nga miting, isip kabahin sa padayong pagpatuman sa peace and order program sa probinsya ubos sa BANGON strategic agenda sa gobernador. (James Oliver)
