Giingong direktang paglapas sa balaod ug pagdala og dakong kagubot sa nasod ang plano nga dili sundon ang sakto nga ihap sa boto sa impeachment trial batok kang Bise Presidente Sara Duterte.
Mao kini ang gipahayag ni MASASA Alliance founding convenor Ben Ranque, diin gikwestyon niya ang Senado sa pagbalewala sa pahayag ni retired Justice Adolfo Azcuna kinsa maoy mismong naghimo sa lagda sa impeachment sa 1987 Constitution.
Gitin-aw ni Ranque nga si Azcuna ang pinakakasaligan nga abogado sa maong higsutanan tungod kay siya ang nangulo sa komite nga naghan-ay sa maong balaod.
Tungod niini, nagpasidaan ang grupo nga kon ipadayon sa Senado ang pagbaliko sa 16 ka boto nga requirement, maguba ang sistema sa hustisya sa nasod.
