Nabalaka si kanhi alkalde sa dakbayan sa Cagayan de Oro ug propesor sa balaod nga si Atty. Oscar Moreno sa nakitang mga iregularidad ug kwestyonableng pangalan sama ni Mary Grace Piattos bahin sa paggamit sa confidential funds sa Office of the Vice President ug Department of Education.
Sa interbyu sa Bombo Radyo gibutyag sa kanhi opisyal nga mahinungdanon kaayong maestablisar kung kinsa gayod ang naghatag og awtoridad sa pag-encash sa maong mga tseke nga nagkantidad og 37.5 million pesos pinaagi sa pagsusi sa koneksyon sa nidawat sa kwarta ngadto sa Landbank.
butyag sa propesor, ang paglihis sa husto nga proseso ug lagda nga ‘Know Your Client’ sa bangko naggikan sa sayop nga pagdumala sa salapi sa katawhan nga klarong nakalapas sa patakaran.
Gumikan niini, gipatugbaw sa eksperto nga ang maong mga pagtipas sa sistema mahimong magsilbing lig-on nga basehan aron mapamatud-an ang pagluib sa pagsalig sa publiko ug culpable violation sa Saligang Balaod.
