MALIPAYON ang inahan sa usa ka biktima sa drug war human adunay kalihokan na sa kasong crimes against humanity nga giatubang sa kanhi Presidente Rodrigo Duterte.
Namahayag si Naneth Castillo, inahan sa usa ka drug war victim, nga dako ang ilang kalipay human gideklarar sa ICC Pre-Trial Chamber I nga “fit to stand trial” si Duterte, human sa pipila ka bulan nga napending ang kaso.
Matod pa ni Castillo, nadugay ang proseso tungod sa argumento sa kampo ni Duterte nga dili siya angay motambong sa trial kay kuno dili siya “fit to stand trial” tungod sa giingong memory loss ug cognitive decline.
Apan bisan pa sa kahimtangan sa panlawas nga giangkon sa kampo ni Duterte, wala mituo ang mga pamilya sa mga biktima sa drug war nga tinuod kini, tungod kay para kanila usa ra kini ka pamaagi aron madugangan ang paglangan sa kaso.
Para kang Castillo ug sa uban pang mga pamilya sa mga biktima sa kampanya kontra droga sa administrasyon ni Duterte, ang nahitabo nagpasabot nga bisan pa unsaon pagkomkom sa kamatooran, motungha gihapon kini sa hustong panahon.
