Wala masabti sa National Citizens’ Movement for Free Elections o NAMFREL ang panginahanglanon sa paglugway pa sa termino sa mga opisyal aron lang malipyohan ang komunidad batok sa kriminalidad ug mapalambo ang mga programa sa barangay.
Kini ang gipahayag sa opisyal sa grupo nga si Nestor Banuag kabahin sa nagpadayong mga lakang nga iduso na usab ang pag-oktaba sa Barangay ug Sangguniang Kabataan Elections.
Gihatagan og gibugaton sa NAMFREL nga dili ang paglugway sa termino ang solusyon sa maong mga isyu tungod kay regular kini nga trabaho sa mga opisyal sa komunidad.
Gipasidaan usab sa grupo nga ang pagpahigayon lamang sa tinood ug regular nga eleksyon ang makalimpyo sa komunidad pinaagi sa pagpili og mga bag-ong lideres nga adunay tulubagon sa katawhan.
