Gilaraw ni City Councilor Roger Abaday ang pagduso sa paspas nga operasyon sa medical waste treatment facility nga nahimutang sa sanitary landfill sa Cagayan de Oro.
Sumala sa konsehal, ang siyudad nag-generate og 14,000 ka kilo sa medical waste matag adlaw gikan sa upat ka gobyerno nga ospital, siyam ka private hospitals, 37 ka laboratories, ug unom ka hemodialysis facilities.
Una niini, gipadayag ni Abaday nga luoy ang mga medical facility sa siyudad tungod kay adto pa sila maglabay sa basura sa Davao, Tagum, ug General Santos nga nagpasabot og dako nga gasto sa transportasyon.
Busa, gipasa na niya kini sa komite sa environment and public health aron matuki ang pag-fast track sa pasilidad o pag-agni og mga investor nga makahatag usab og dugang revenue ug trabaho sa siyudad.
Dugang pa niini, gipunting sa opisyal nga dako ang matipid sa JR Borja Hospital lamang kung makompleto ang koneksyon sa kuryente ug maka-operate na ang pasilidad dinhi mismo sa Cagayan de Oro.
