Gi-akusahan sa United People’s Initiative nga gi-plano ang pagtangtang ug pag-impeach kay Bise Presidente Sara Duterte aron dili kini makababag sa tinguha sa mga naglingkod nga opisyal nga patas-an ang ilang termino sa pwesto
Gipadayag ni UPI Secretary General Capt. Rey Valeros Jr. nga gigamit lang ang panggamhanan lakip ang NBI ug Ombudsman aron ipiton ug pasakaan og kaso ang Bise Presidente human usab gipaluya ang mga alyado niini sa Senado.
Dugang pa sa opisyal, kung matangtang na sa pwesto ang Bise Presidente, isunod dayon sa mga pulitiko ang pagbalhin sa Konstitusyon pinaagi sa Constitutional Assembly alang sa term extension.
Busa, nanawagan ang grupo sa katawhan nga mag-alerto ug batokan ang bisan unsang lakang nga nag-abuso sa balaod alang sa personal nga interes sa pipila.
