Gilantaw ni Mayor Rolando “Klarex” Uy nga usa ka lakang sa pagpalapad sa libreng edukasyon ang planong pagbalhin sa City Hall ngadto sa Uptown Carmen pinaagi sa paghimo sa mabakanteng daan nga City Hall building nga ikaduhang kampus sa City College.
Sumala sa lider sa dakbayan, ang unahan nga bahin sa daang pasilidad mahimong museyo samtang ang luyo nga bahin ipahimutang alang sa mga kwarto ug pasilidad sa mga estudyante.
Segun ni Uy, magpadayon gihapon ang kasamtangang kampus sa Barangay Agusan aron adunay prayoridad ang mga batan-on sa sidlakang bahin sa syudad nga makatungha.
Busa nagpasalamat ang opisyal sa suporta sa konseho sa dakbayan sa pagtubag sa pangandoy nga matagaan og mas lapad nga oportunidad sa pagtuon ang mga sumusunod nga henerasyon.
