Pagtutok sa UNITY nga plataporma nga naglakip sa pagpalambo sa panglawas, edukasyon, ug social services ang sentro sa gipahigayon nga State of the Mayor’s Address ni Villanueva Municipal Mayor Julio Uy kagahapong adlawa.
Gipasabot sa mayor nga nagpabilin ang iyang prayoridad sa paghatag og saktong tambal ug pasilidad sa mga rural health unit ug hospital aron masiguro ang paspas nga pagserbisyo ilabi na sa mga emerhensya.
Dugang pa niini, gihatagan usab og dakong gibug-aton ni Uy ang edukasyon isip yawe sa kaugmaon sa mga kabatan-onan pinaagi sa paghatag og kalidad nga mga classrooms ug mga scholarship program.
Gipasalig usab sa opisyal nga ang pagtunol sa tabang pinansyal ngadto sa mga nanginahanglan ipahigayon nga walay pinalabi, walay bulok sa politika, ug walay korapsyon.
Sa katapusan, iyang gipasiugda nga ang pagpauswag sa imprastruktura sama sa mga dalan ug tulay kabahin sa ilang paningkamot nga makahatag og mas progresibo ug mauswagon nga kaugmaon alang sa tanang taga-Villanueva.
