Pagpanalipod sa boto ug dili pagpang-harass sa mga tawo ang gipangayo sa mga residente taliwala sa pagbaha sa mga militar ug pulis sa Lanao del Sur.
Gipasabut ni MSU 4 Palestine Lead Convenor Asmana Umpat nga sanglit kapin sa katunga sa mga lungsod ang gi-markahan nga red level sa Commission on Elections (COMELEC), kinahanglang masiguro nga ang mga sundalo ug pulis magsilbing tagaprotekta sa patas nga eleksyon ug dili magpagamit sa mga dagkong politiko alang sa pagpang-hadlok sa mga botante.
Dungan niini, gipamugos sa grupo nga kinahanglang magpabilin nga libre ug walay kahadlok ang pagbotar sa matag tawo sa lalawigan.
Gipanawagan usab sa organisasyon sa gobyerno nga pahigayonon og kalinaw ang makasaysayang eleksyon aron masiguro nga ang tinuod nga gusto sa katawhan ang mogawas ug dili ang dikta sa mga gamhanang pamilya ug warlord sa dapit.
