CAGAYAN DE ORO CITY – Gipangayua’g tubag sa Association of Brgy Councils/ABC-Cagayan de Oro chapter si incumbent Gusa Brgy Kapitan Marlo Tabac batok sa tinguha nga pagpalagpot kaniya isip ikaduhang pinakataas nga opisyal sa liga ning syudad.
Kini human wala uyuni sa ABC National League ang hangyo sa grupo ni ABC President ug incoming 2nd District City Councilor Alam Lim nga mohimo’g special election sa pagka-bise presidente kay gitaktak nila si Tabac gumikan sa isyu sa loss of trust and confidence.
Miingon ang tinahasang tigpamaba sa liga nga si Baikingon Brgy Kap Jao Gumapac nga nahimong ‘premature’ ang ilang gihimong pugsanong pagpakanaug kang Tabac kay wala nila sunda ang ensaktong proseso subay sa constitution and by-laws sa kahugpungan.
Siya miingon nga tungod sa gabayan nga gilugwa sa nasudnong-liga, gipatubag nila si Tabac sulod sa napulo ka adlaw kung nganong dili angay tangtangon sa iyang puwesto kay nawad-an na sila sa kumpiyansa ug pagsalig ngadto kaniya isip ABC official.
Matud ni Gumapac nga tungod sa gipangayo sa ilang mga opisyal sa kauluhan, mahikyad na ang mga basehan sa pagkawala sa pagsalig ug kumpiyansa ngadto sa kauban nila nga kapitan.
Kini tungod kay igo madawat nila ang tubag ni Tabac,gilayon nila isaka sa kauluhan kuyog ang mga giingong mga testimonya sa mga gipakang nga isyu batok niini.
Dumduman nga una nang namahayag si Brgy 18 Kapitan Federico Rivera nga dili angay ipihig si Tabac sa batakang katungod sa kini maka-depensa batok sa mga pasangil nga gimugna sa ABC kontra kaniya.
Siya miingon nga taliwala nga naguba ang dungog ni Tabac apan sa kahiladman niini,nagpabilin ang pagsilbing ‘color green’ diin dayag nagsuporta sa liderato ni City Mayor Klarex Uy.
