CAGAYAN DE ORO CITY-Giangkon ni Cagayan de Oro City 2nd District Rep. Maximo Rodriguez nga niadto pang bulan sa Enero ang plano nga langkaton sa pwesto si House Speaker Pantaleon Alvarez.
Siya miingon nga bisan gani bulan sa Disyembre sa miaging tuig, iya nang nadunggan ang report nga adunay grupo sa mga kongresista ang naglaraw nga langkaton siya sa pwesto apan iya lamang gibalewala.
Nakurat na lamang siya sa mga miggawas nga report nga posibleng mahinayon ang rigodon sa kamarabaha atol sa pagbukas sa sesyon sa Kongreso batok kang Alvarez.
Gikompirmar ni Rodriguez nga maoy nakapadugay sa 3rd SONA ni Duterte ang kalit nga paglangkat sa pwesto ni Alvarez.
Si Rodriguez miingon nga nalangan si Pres Duterte tungod kay gipatawag pa niini sila si Alvarez ug Pampanga Rep Gloria Macapagal Arroyo aron hisgutan ang natigayon nga tensyon sa duruha.
Hisayran nga naglisod pagdawat si Alvarez nga hulipan siya ni Arroyo isip House Speaker sa boto nga 184 samtang 12 ang nag-abstain.
