Gipahayag ni Atty. Ramil Acol, City Election Officer sa ikaduhang distrito sa Cagayan de Oro, nga wala nay extension o dugang nga adlaw alang sa pagpangrehistro sa mga botante para sa BSK Elections karong Nobyembre.
Matod pa niya, gihan‑ay na kini sa balaod ug resolusyon sa Comelec ug dili na mausab.
Gumikan niini, ang mga wala makaapas sa cut‑off kagahapon ug karon pa lamang nakahukom nga magparehistro, mamahimo na lamang nga magparehistro pag‑usab sa bag‑ong tuig 2027 alang sa 2028 elections.
Sa laing bahin, giklaro ni Acol nga rehistrasyon lamang ang gidawat sa katapusang adlaw ug wala sila nag‑isyu og uban pang serbisyo sama sa voters certification.
Sa katapusan, magpadayon ang buhatan sa pagpangandam alang sa nagkadool nga Barangay ug Sangguniang Kabataan Elections karong Nobyembre 2 samtang mubalik na usab sa naandan nga serbisyo ang Comelec sama sa paghatag og sertipikasyon.
