Lihok-protesta ang ikasa karong adlawa sa mga pundok sa katilingban sa Iligan City aron babagan ang pagsulod sa mga pribadong kompanya sa pagpaayo sa Agus-Pulangi Hydropower Complex.
Gipahayag ni Yadz Gonzales sa Philippine Movement for Climate Justice nga angay mangilabot ang mga Mindanawon tungod kay ang maong pasilidad ang nag-unang gigikanan sa limpyong kuryente sa isla.
Gipasabot sa opisyal nga nabalaka ang publiko kung ikatugyan sa dagkong negosyante ang pondo tungod kay posibleng mosaka pa ang bayronon sa kuryente.
Gawas sa isyu sa pagpribado, bitbit usab sa maong martsa sa dakbayan ang panawagan batok sa nagasige nga pagmahal sa singil sa matag panimalay.
