Padayon ang pagsupak ug pagkigbisog sa Mindanao Power Consumers Federation batok sa plano nga paghatag sa pag-ayo sa Agus-Pulangi Hydroelectric Complex ngadto sa mga pribadong kompanya nga San Miguel Global ug Santa Clara International.
Gipasabot ni Dr. Melchie Ambalong, ang Chairperson sa maong kapunungan, nga gigamit na nila ang Executive Order Number 02 o ang lagda sa Freedom of Information aron mangayo og katin-awan sa mga patakaran sa gipahigayon nga bidding gikan sa Public-Private Partnership Center ug sa Power Sector Assets and Liabilities Management Corporation.
Apan gibutyag sa opisyal nga nibalibad ang maong mga ahensya sa paghatag sa kumpletong datos, hinungdan nga nagpadala na usab og opisyal nga suwat ang ilang kaubang abogado sa Zaragoza Law Office aron matukad ang maong kontrata.
