Gisaway sa pundok sa Kilusang Mayo Uno ang gihimong pagpugong sa mga negosyante sa National Capital Region sa pagpatuman sa 85 pesos nga umento sa suholan sa mga mamumuo samtang aduna kiniy kapasidad nga mubayad og abogado para maka-reklamo ug makapagawas og TRO.
Sumala ni KMU Northern Mindanao representative Tita Hadman, dili katungod sa korte nga mopugong sa mga labor order tungod kay dapat didto moadto sa National Tripartite Wages and Productivity Board ang mga employer kon aduna silay reklamo o apelasyon sa maong umento.
Gitakda nga idugang sa sweldo ang 50 pesos ug sundan sa 35 pesos sa Enero, apan nababagan kini sa korte human nag-petisyon ang duha ka construction companies.
Tungod niini, nagpabilin ang panawagan sa ilang grupo nga ipatuman ang 1,200 pesos nga minimum wage kada adlaw aron makasugakod ang pamilya sa mga trabahante taliwala sa taas nga presyo sa mga palitonon.
