CAGAYAN DE ORO CITY – Gituki sa House Committee on Suffrage and Electoral Reforms ang isyu sa giingong grabeng pagsaka sa ihap sa mga bag-ong botante sa Brgy Carmen ning syudad sa kamarabaha sa kauluhan.
Kini agi’g tubag sa resolusyon nga giduso ni Cagayan de Oro 1st District Cong. Lordan Suan nga mahataga’g higayon nga ma-imbestigaran ang alang kaniya kuwestiyonable nga kalit pagdagsa sa mga botante sa miaging registration period sa maong brgy.
Dili miembro si Suan sa komitiba nga gihuptan ni Cong. Maximo Dalog nga nagdungog sa maong isyu apan gihatagan kini’g higayon nga makahatag sa iyang komento sa isyu.
Sa maong presenya ni Suan, gisundayag niya ang video clip ni City Mayor Rolando ‘Klarex’ Uy atol sa flag raising sa city hall employees nga naghisgot sa miaging 2023 barangay ug SK elections.
Alang kang Suan,nagdala’g pagdani ang mensahe sa mayor nga mobalhin sa ilang rehistro ang katawhan ngadto sa Brgy Carmen diin nagsilbing punong brgy ang iyang anak nga si Kikang Uy kinsa mahimong kaatbang ni Suan pagka-kongresista sa 2025 midterm elections sa distrito uno ning syudad.
Una nang namugos si Suan nga tungod sa naghinobrang paggamit ni Kikang sa brgy resident certifications, napasayon ang pagsulod sa mga bag-ong botante gikan sa laing lugar aron marehistro.
Apan alang kang Kikang,pagtubag kadto sa katawhan sa panawagan sa Commission on Elections nga magpa-rehistro rason nga nilibong mga residente ang midangop sa distrito uno.
Dumduman nga gipatawag sa komitiba ang mag-amahang Klarex ug Kikang apan wala makatunga tungod sa mas unang mga obligasyon sa ilang katawhan sa dakbayan.
Hisayrang gisang-atan sa Comelec sa disqualification case si Kikang tungod sa maong isyu apan kalit gisibog kay mangita pa sila sa dugang ebedensiya kabahin niini.
