Gipamatud-an ni CdeO 2025 Bar Passer Kim Velez nga kinahanglan magsakripisyo ang tawo aron makab-ot ang tinguha sa kinabuhi. Isip usa ka kanhi magtutudlo ug inahan, mas gipili niyang mu-undang sa trabaho aron makapukos sa iyang pagtungha sa abogasiya. Mi-angkon si Velez nga ikaduha na siyang mikuha sa Bar Exam, kay napakyas siya sa unang take, dihang sobra ka busy ang iyang oras isip magtutudlo, inahan ug magtutungha sa Abogasiya sa Xavier University. Mi-agi usab kini’g postpartum depression tungod sa iyang unang kapakyasan ug dinhi niya gipakilid ang iyang pagsilbing magtutudlo. Sa miaging tuig, panahon sa iyang pag-rebyu, masaligon ug kumpiyansa si Velez nga mupasar na sa pasulit nga nahatagan niya sa igong attensyon ang iyang pagtungha dungan sa pagpadako sa iyang anak. Mapasalamaton usab kini sa iyang mga ginikanan nga walay hunong ang pagsuporta kaniya ug maoy nag-awhag kaniya nga mukuha sa ikaduhang pasulit. Hisayran nga ilado ang kaliwatang Velez isip mga respetadong abogado sa lungsod sa Cagayan de Oro.
