Gipahinumdum sa magtiayon nga sila Dr. Rodrigo Alenton ug Mrs. Rosemarie Alenton ang mga magtiayon, ilabi na ang mga benepisyaryo sa 4Ps, sa kahinungdanon sa pagpalalom sa relasyon sulod sa kaminyoon.
Si Dr. Rodrigo Alenton, EDUCHILD and Gabay Pamilya for CDO area chairperson, mipasiugda nga dako og papel ang komunikasyon sa usa ka relasyon, labi na sa panahon sa problema ug kalisdanan.
Sumala kaniya, ang tin-aw ug matinud-anong pakig-istorya makatabang aron malikayan ang panagsumpaki ug mas mapalig-on ang panag-uban sa magtiayon.
Gipunting usab niya ang importansya sa paghatag og igong panahon ug oras sa pamilya aron mapalalom ang relasyon sa matag miyembro ug makahimo og lig-on nga pundasyon sa panimalay.
Gidugang pa nga ang komunikasyon kinahanglan sabayan sa pagpamati ug pagsabot aron makab-ot ang tinuod nga pagkasinabtanay sa magka-relasyon.
Si Dr. Rodrigo Alenton ug Mrs. Rosemarie Alenton nakaluntad na og 43 ka tuig sa mabungahon ug malipayon nilang kaminyoon, nga ilang giila nga bunga dili lamang sa paghigugmaay kundili sa pagpamati ug paghatag bili sa matag usa.
