Nabalaka ang mga ekonomista sa posibleng dangatan sa World Market kung mahuptan sa Iran ang kompletong pagkontrolar sa Strait of Hormuz.
Sa miaging semana, namahayag ang Iranian Parliament nga napasar na sa ilang konseho ang resolusyon nga nag-endorso sa pagsira sa Strait of Hormuz isip tubag sa airstrikes nga gihimo sa Estados Unidos batok sa tulo ka nuclear facilities sa Iran.
Ang maong mga airstrikes unang gi-nganlana’g “Operation Midnight Hammer”, ug giila sa US nga usa ka “military success” nga nagtumong sa pagbungkag sa kapasidad sa Iran sa nuclear enrichment.
Lakip sa mga maapektuhan sa pagsira sa kipot ang kalibutanong ekonomiya, ilabi na sa presyo sa lana ug inflation.
Segun sa mga eksperto, ang Strait of Hormuz usa sa labing kritikal nga agianan sa dagat sa kalibutan, diin kapin sa 20% sa global nga suplay sa lana ug halos 30% sa LNG (liquefied natural gas) ang muagi matag adlaw.
Kung kini isira, ang presyo sa lana posibleng musaka’g kalit, gikan sa kasamtangang $77 ngadto sa $120 hangtod $150 kada bariles, segun sa prediksyon sa mga analyst.
Ang epekto niini dili lang limitado sa sektor sa enerhiya.
Ang usbaw sa presyo sa lana magpasaka usab sa transportation costs, manufacturing expenses, ug presyo sa mga palaliton, nga mahimong mosangpot sa global inflation.
Ang mga barko mapugos nga molibot sa mas layo nga ruta, sama sa Cape of Good Hope, nga magdugang sa 12–14 ka adlaw sa biyahe ug kapin sa $500,000 nga dugang galastuhon sa gasolina kada barko.
Base sa pagtuon, bisan ang usa ka adlaw nga pagsira sa Strait makamugna gilayon sa $10–15 bilyon nga kadaut sa global economy, lakip na ang pagkawala sa kitaan sa mga Gulf states.
Wala pay labot niini ang paghagba sa insurance premiums, ug pagka-oktaba sa mga shipment.
Ang International Energy Agency nagpasidaan nga bisan ang temporaryo nga disruption makahatag sa “severe consequences” o grabeng epekto sa merkado sa lana.
Sa laktod, ang Strait of Hormuz dili lang usa ka agianan sa lana — usa usab kini sa pinaka kritikal nga bukog sa global economy.
Ang hulga sa pagsira niini nagpasabot sa seryosong risgo sa kalibutanong kalinaw sa ekonomiya, nga posibleng mosangpot sa recession ug taas nga cost of living sa daghang nasud.
