CAGAYAN DE ORO CITY-Giangkon ni PNP regional director C/Supt Timoteo Pacleb nga gikaalama nila ang presensiya sa siyam ka mag-uuma nga mga langyaw nga miembro sa Asian Peasant Coalition o APC nga hilom misaka sa bukirang bahin sa Brgy Tingalan,Opol,Misamis Oriental sa miaging adlaw.
Kini ang hinungdan nga gilayong nagpadala sa dugang puwersa si Misamis Oriental Provincial Police Director Sr/Supt Rolando Destura aron pagpangita sa maong mga langyaw.
Gikompirmar ni Opol Police Station commander Sr/Insp Dennis Flores nga mihimo’g lectures ang maong mga mag-uumang langyaw kabahin sa ‘palm oil plantation’ sa ilang lungsod.
Giangkon ni Flores nga mibati sila’g kabalaka kon unsa’y mahitabo sa mga foreigner nga gilakipan sa Indonesian ug tag-upat ka Thailanders ug Cambodian.
Una niini,giingong gikadismaya sa Kilusang Magbubukid ng Pilipinas MisOr chapter Sec Gen Irenio Udarbe ang gihimo sa kapolisan ngadto sa maong mga mag-uuma.
