CAGAYAN DE ORO CITY-Gitawag sa PNP-10 nga peke ang report nga nakasulod na ang ISIS bombers ug expert bomb makers sa Mindanao.
Kini may kalabutan sa mikatag nga memorandum sa PRO-10 sa social networking site nga nagbutyag nga likayan ang pag-adto sa mga pampublikong lugar ilabina nga maoy target sa pagpamomba ang Zamboanga City, Davao City, Manila, Cebu, Ilo-Ilo ug Cagayan de Oro.
Matud ni PNP regional spokesperson Supt Lemuel Gonda nga walay kamatooran ang maong memorandum diin gi-peke pa ang pirma sa opisyal.
Siya miingon nga ilang gi-validate ang report ug nasuta nga usa kini ka fake news.
Samtang nanawagan si Supt Gonda sa internet users nga dili magpataka’g pasa sa mga report may kalabutan sa mga terorista.
Kini tungod kay makahatag kini’g kahadlok sa publiko.
Si Gonda miingon nga kinahanglang maoy toohan sa publiko ang balita gikan sa Camp Alagar tungod kay nakasegurado sila nga validated kini.
Gani, gihangyo usab niini ang internet users nga isumbong sa ilang buhatan ang reports may kalabutan sa mga pagpamomba aron ilang ma-validate.
