CAGAYAN DE ORO CITY- Gikasuko sa grupong EcoWaste Coalition ang pagkasunog sa mga basura sa Verde Soko Philippines diha sa Sitio Bugwak,Brgy Sta Cruz,Tagoloan,Misamis Oriental.
Miingon si EcoWaste Coalition national coordinator Aileen Lucero nga suportado nila ang lakang ni Misamis Oriental 2nd District Rep Juliette Uy nga masuta ang pagkasunog sa mga basura.
Dugang ni Lucero nga dili angay palabyon kon dunay mihimo’g pagsabotahe sa mga basura nga nagsilbing ebedensiya sa pending nga kaso batok tulo ka Koryano ug lima ka Pinoy nga utok sa ilegal pagpalusot sa kargamento.
Samtang hugtan ni Mindanao Container Terminal o MCT collector John Simon ang pagbantay sa mga nabilin nga basura diha sa Sitio Bugwak,Brgy Sta Cruz,Tagoloan,Misamis Oriental.
Tumong niini nga dili na subli pang mahitabo ang pagkasunog sa mga basura ug mabalik kini sa South Korea.
Sumala ni Simon nga gitugyan niini sa mga otoridad ang pagsuta kon tinuyo ug o natural ang pagkasunog sa mga basura.
Gipanganti usab ni Simon nga iyang paimbestigaran kon kinsa ang gisugo sa pagdaub sa mga basura nga andam na unta dalhon sa MCT aron ikarga sa barko nga ipadala sa South Korea.
