Gipadayag sa grupong Akbayan Youth sa Iligan ug Lanao ang ilang dakong pagsupak sa plano nga pribatisasyon sa Agus-Pulangi Hydroelectric Complex.
Sumala ni Jhune Ace A. Lubang Chairperson sa maong organisasyon, ang maong lakang magdala og bug-at nga epekto sa mga konsumidor tungod sa gipaabot nga usbaw nga duha ka pesos matag kilowatt sa bayranan sa kuryente.
Dugang pa niya, dili lang kini makapabug-at sa panginabuhi sa mga residente, apan mopataas usab kini sa presyo sa mga palaliton ug serbisyo tungod sa pagmahal sa enerhiya.
Nunot niini, gihatagan og gibug-aton ni Lubang nga angayan gyud nga madungog ang tingog sa katawhan bahin niini nga isyu.
Sa katapusan, nanawagan siya sa pagpanalipod sa interes sa mga umaabot nga henerasyon batok sa privatization nga makadaot sa ilang kaugmaon.
