Nausik ang higayon sa Pilipinas nga makakuha og ayuda ug suporta gikan sa mga kasilinganang nasud tungod sa pagtabon sa administrasyon sa mga kabus nga lugar sa Metro Manila atol sa ASEAN Summit.
Bisan og gitabunan og paril ang mga pinuy anan sa mga kabus, nasayod na daan ang mga langyawng lider sa tinuod nga kahimtang sa nasud pinaagi sa datos gikan sa ilang mga magtatambag, pasabot ni Ateneo de Davao University Political Analyst Professor Ryan Maboloc.
Imbes nga magpakaaron ingnon atubangan sa mga bisita, mas maayo untang gipakita ang tinuod nga sitwasyon sa mga Pilipino aron makita sa mga lider sa rehiyon kon asa makatabang sa pagpalambo sa panginabuhian sa katawhan.
Ang pagtago sa kamatuoran nagpakita og taphaw nga pagdumala ug sayop nga sumbanan sa katungdanan sa Pilipinas sa ASEAN, panapos sa analyst.











