CAGAYAN DE ORO CITY – Gipamugos sa city engineering department nga wala makahatag sa grabeng kadaot ang pagtay-og sa 6.3 magnitude nga linog sa North Cotabato apan apektado ang syudad.
Kini human mibati’g kalabaka ang syudad sa posibleng epekto sa maong linog diin mikalas sa 5 ka tawo ug dul-ag 20 ang samaron.
Miingon si City Engr Roland Pacuribot nga bugtong ang tunghaang publiko lamang sa Brgy Bugo ning syudad ang balikan nila kay may natala nga pagliki niini.
Una na usab gikompirmar ni Pacuribot nga pipila sa tiles sa Luxe Hotel ang nangatangtang apan wala kini makaapektar sa ponduasyon niini aron maghunyang.
Samtang gitambagan ni Philippine Institute of Volcanology and Seismology o Philvocs Director Renato Solidum ang mga apektado sa grabeng linog nga dili mahinugon sa ilang kabtangan.
Kini kon maigo sa linog ang ilang gambalay ug pinuy-anan sama sa nahitabo sa North Cotabato diin mitala sa lima ka tawo ang namatay.
Miingon si Solidum nga mas importante ang kinabuhi sa tawo itandi sa kabtangan nga subli ra nga mahuptan paghuman sa pag-igo sa trahedya sama sa linog.
Naigo sa 6.3 magnitude nga linog ang North Cotabato ug ubang bahin sa Mindanao nga nagresulta sa kamatayon sa lima ka tawo ug dul-ag 20 ang samaron sa miaging gabii.
