Prioridad una sa 901st Infantry Batallion, Philippine Army ang pagpahiluna sa patay’ng lawas sa dakong opisyal sa Communist Party of the Philippines- New People’s Army nga si Myrna Sularte alyas Kumander Maria Malaya sa Brgy Pianing,Butuan City.
Kini kay sa maka-pokus sila sa paghatag sa reward money balor P5.6 milyon bugti sa ulo ni Malaya nga kasamtangang nakahaya una sa punerarya sa maong syudad.
Gibutyag ni 901st IB commander Brig Gen Arsenio Sadural nga dili pa nila prioridad ang pagtuki sa premyo kay maoy gusto nila nga makuha sa kabanay ang maong notoryos nga rebeldeng opisyal aron mahatagan sa pormal nga haya.
Giila usab ni Sadural nga dakong kawad-on sa CPP-NPA’s North Eastern Regional Committee ang kamatayon ni Malaya kinsa kapikas sa napatay usab nga si Jorge Madlos alyas Ka Oris sa Impasug-ong,Bukidnon.
Nasuta nga graduwado sa kurso sa kolehiyo si Malaya ug pag-abot sa tuig 1997,misulod na kini sa aktibong kalihukan sa CPP-NPA gikan sa iyang hometown sa Bayugan City.
Una nang gikompirmar sa kanhi NPA rebels nga ang ilang opisyal nga si Malaya ang napatay sa militar sa tulo ka hugnang engkuwentro sa Brgy Pianing kagahapon sa hapon.
