CAGAYAN DE ORO CITY – Gikonsidera na sa kapolisan nga sulbad na ang pagkatulis sa duha sa jewelry pawnshops ug bank ATM nga gisulod sa mga gitoohang tulisan sa Gaisano Capital Mall sa Purok 3,Sitio Baybay,Brgy Sta Cruz,Ozamiz City,Misamis Occidental.
Kini human nadakpan ug nakasuhan na ang mga gitumbok nga responsable sa piskalya sa dakbayan sa Ozamiz.
Miingon si Police Regional Office 10 spokesperson Maj Joann Navarro nga inisyal nga gitug-an sa usa sa mga pawshop representative nga balor sa 30 milyones pesos nga salapi ug alahas ang nadala sa mga kawatan atol sa hitabo.
Nasuta sa kapolisan nga petsa 31 sa Disyembre gisugda’g lusob sa mga kawatan ang maong mall ayha nadiskobre sa pagka-uno na sa buntag sa Enero ning tuiga.
Una niini,personal nga gisusi ni PRO 10 Director Brig Gen Ricardo Layug Jr ang crime scene sa miaging adlaw.
Samtang dili konektado sa notorious criminal gangs ang grupo nga milungkab sa dakong patigayon aron makawat ang minilyong kantidad sa salapi ug mga alahas sa Ozamiz City.
Kini human tumbuka ni Ozamiz City Police Station commander Maj Dennis Tano nga bag-ong naporma nga grupo lamang ang milusob sa Gaisano Capital aron mohimo sa paglungkab sa duha ka pawnshops ug pagguba sa Metrobank ATM.
Gani,giila ni Tano ang lima sa mga dinakpan nga nag-atubang na robbery complaint sa piskalya nga sila Alfred Gomez Baterna;Francis Joe Sayson Baterna;Alberto Quimlo Batolaso nga pulos taga-Tangub City;Brian Komplito Montealto ug Ramil Apatan Villarmente nga gikan usab sa Zamboanga del Sur.
Siya miingon nga natumbok ang mga suspek nunot usab sa pagsilbing testigo na sa usa sa mga dinakpan sa maong kremin.
