Gipahinumduman sa Catholic Faith Defenders Cagayan de Oro ang mga magtutuo nga dili yaga-yagaan ang pagpabadlis og krus sa agtang atol sa pagsaulog sa Ash Wednesday.
Matod ni Wenie Mingo sa Catholic Faith Defenders Cagayan de Oro, dili angay tawagon nga pagpaka-aron ang maong tradisyon tungod kay ang krus nga gibadlis sa agtang simbolo sa gahum sa Dios ug timaan sa pagtuo.
Gipasabot ni Mingo nga ang pagpabadlis og abo usa ka pahinumdom sa pagpaubos sa tawo atubangan sa Ginoo.
Iyang giingon nga sumala sa Bibliya, ang tawo gikan sa abog ug mubalik lamang sa abog, nga nagpasabot sa paghinumdom sa pagkahuyang sa tawo ug sa panginahanglan sa paghinulsol.
Gidasig usab sa grupo ang mga Katoliko nga sabton ang espiritwal nga kahulugan sa Ash Wednesday ug dili kini himuong porma lamang sa tradisyon, kondili usa ka higayon sa pagbag-o ug paglig-on sa pagtuo. (James oliver)
