Nabahin ang mga reaksiyon sa legal nga sektor human sa kontrobersyal nga pahayag ni Presidential Sister ug Senador Imee Marcos atol sa INC Prayer for Peace Rally sa milabay nga semana. Alang kang Atty Eddie Cuaresma, kanhi presidente sa Integrated Bar of the Philippines (IBP) CdeO-Misamis Oriental Chapter, dakong rebelasyon ang gisulti sa senador batok sa iyang igsoon nga si Presidente Bongbong Marcos. Apan daghang abogado ang mipamugos nga alegasyon lamang kini ug dili matatawag nga rebelasyon, ilabi na kay wala kini igong ebidensya nga nagpalig-on sa iyang mga pasangil batok kang First Lady Liza Araneta ug Congressman Sandro Marcos. Subli, gipamugos ni Cuaresma nga ang “burden of proof” anaa sa kamot ni Imee isip tinubdan sa impormasyon, ug kung mapamatud-an nga walay basehan, posible nga makapasaka sa kaso ang First Family batok sa senador isip timaan sa posibleng pagkabugto sa ilang panag-uban isip usa ka pamilya.
