CAGAYAN DE ORO CITY – Patay ang pahenante samtang samaron ang 11 pa ka tawo sa dugu-ong disgrasya tali sa elf-truck ug Donsal passenger bus sa national highway,Sitio Baloy,Brgy Tablon ning syudad kaganihang buntag.
Giila ni Police Staff Sgt Maximo Judea,imbestigador sa Traffic Enforcement Unit sa Cagayan de Oro City Police Office (TEU-COCPO) ang namatay nga si Reggie Villarobia,hingkod ang edad nga nagsibling pahenante ni Alexis Navarro nga taga-Brgy Bango,Libona,Bukidnon nga nagmaneho sa elf-truck.
Matud ni Judea nga sumala sa saysay sa Donsal passenger bus driver nga si Retchel Montecer nga taga-Valencia City,Bukidnon nga kusog nang daan ang dagan sa truck nga gikan pa gipaayo nga kanhi kargado sa mga bolanghoy nga misungag sa ilang linya.
Siya miingon nga nasaysay usab ni Navarro nga nawad-an sa preno ang truck nga padulong sa kasadpang direksyon hinungdang gipaningkamutan makamani-obra apan nasapon ang bus nga pasulod usab dinhi sa syudad.
Nasuta nga anaa sa halos 10 ka pasahero ang naangol gumikan sa ilang pagkalamba sulod sa bus epekto sa kakusog sa impact.
Gidali pa pagdala sa CDRRMD-USAR rescue team sa ospital si Villarobia apan wala na kini naluwas pa sa mga nangatiman nga mga doktor.
Temporaryo usab nga gikustodiya sa kapolisan ang bus driver gumikan sa kinabuhi nga nakalas ug mga samaron sa panghitabo.
Gilauman nga adunay negosasyon tali sa duha ka panig sanglit aksidente ang panagsungag sa bus ug truck.
